Vetrargolf Dalbúa
Velli golfklúbbsins Dalbúa hefur nú verið lokað eftir vertíð sumarsins, eins og þeir félagar hafa séð, sem hafa lagt leið sína í Miðdal undanfarið. Líkt og síðustu ár má þó búast við að félagar hafi áhuga á að spila völlinn í vetur, þegar veður leyfir, og á síðasta vetri mátti sjá þó nokkra félagsmenn fara hring á vellinum og þannig spila vetrargolf við oft ágætar aðstæður.

Stjórn klúbbsins fagnar því að sjálfsögðu að félagar geti spilað golf á öðrum tímum en yfir blásumarið, og fallegur vetrardagur er ekki síður til þess fallinn að taka góðan göngutúr á vellinumen góður sumardagur. Stjórn GD vill benda sem flestum félagsmönnum á að nýta slík tækifæri á komandi vetri eins og þau gefast, en jafnframt að hafa í huga að völlurinn getur verið sérstaklega viðkvæmur á þessum árstíma. Því eru félagsmenn hvattir til að fylgja eftirfarandi leiðbeiningum:

• Völlur Dalbúa í Miðdal er lokaður ÖLLUM NEMA FÉLAGSMÖNNUM.
   
• Vinsamlegast NOTIÐ EKKI MARKAÐA TEIGA; hefjið leik á svæðum framan við eða til hliðar við hefðbundna teiga. NOTIÐ ÁVALLT TÍ VIÐ UPPHAFSHÖGG.
   
• TAKIÐ EKKI STANGIR ÚR HOLUM; það kann að vera klaki í holunum og því geta stangirnar brotnað sé reynt að fjarlægja þær.
   
• SLÁIÐ ALLS EKKI BOLTA Á BRAUTUM; skemmdir sem verða á brautum yfir veturinn skilja eftir sig sár, t.d. þegar torfusneplar eru teknir í höggi, og hafa ekki tækifæri til að gróa fyrr en næsta sumar; brautirnar geta því verið afar lengi að ná sér eftir slíkar skemmdir.
   
• Til að forðast þetta vandamál eru kylfingar hvattir til að TÍA UPP ALLA BOLTA Á BRAUTUM eða einfaldlega FÆRA BOLTA ÚT FYRIR BRAUTIR; skemmdir sem verða á röffinu eru veigaminni fyrir völlinn, og verða fljótari að gróa á næsta vori.
   
• ATHUGIÐ: Í flestum golfbúðum er hægt að kaupa sérstök vetrar-tí sem auðvelt er að nota. Þetta eru gúmmí-keilur af mismunandi hæð, festar á einum streng; viðeigandi keila er einfaldlega lögð á jörðina og síðan má setja bolta upp á hana fyrir næsta högg. - Slík vetrar-tí hlífa teigum og brautum alfarið, þar sem kylfur þurfa þá ekki lengur að snerta jörðina !

Fyrirhuguð er nokkur vinna við völlinn í vetur (m.a. áburðardreifing) sem kann að gera ill-mögulegt að spila völlinn á ákveðnum tímum, og vonum við að félagsmenn virði það.

Ef farið er eftir þessum einföldu leiðbeiningum tryggir það hins vegar góða umgengni um völlinn okkar í vetur og kemur í veg fyrir skemmdir. Þannig getur völlurinn komið vel undan vetri og verið fljótur að koma til í vor þegar golf-vertíðin hefst fyrir alvöru.

Gott vetrargolf !

Stjórn Dalbúa.