Guðmundur H. Sigmundsson vallarstjóri Dalbúa, Dr. Erlendur Haraldsson, Guðmundur Ragnarsson formaður félags vélstjóra og málmtæknimanna, Páll Ólafsson formaður Dalbúa og Hafsteinn Daníelsson varaformaður Dalbúa.

Golfklúbburinn Dalbúi fær höfðinglega gjöf – heilan skóg til gróðursetningar

Golfklúbburinn Dalbúi hefur fengið höfðinglega gjöf, sem getur gert mögulegt að breyta vellinum í Miðdal í framtíðinni með áhrifamiklum hætti. Um er að ræða 300 gróskumiklar trjáplöntur – greni, furu og lerki.

Dr. Erlendur Haraldsson, heiðursprófessor við félagsvísindadeild Háskóla Íslands, hefur um langt árabil staðið í mikilli skógrækt við sumarbústað sinni í Snorrastaðahlíð. Erlendur er víðkunnur fyrir fræðistörf sín á sviði sálfræði, auk þess að vera fróðastur Íslendinga um málefni og sögu Kúrda og Kúrdistan; eftir hann liggja fjölmargar bækur og greinar um þau málefni, sem hann hefur helgað rannsóknir sínar.

Erlendur hefur ákveðið að draga úr starfi sínu í skógræktinni sökum aldurs. Því vildi hann bjóða Golfklúbbnum Dalbúa trjáplöntur til gróðursetningar á velli félagsins í Miðdal gegn vægu gjaldi, m.a. til minningar um afa sinn sem hvílir í kirkjugarðinum í Miðdal, en afi hans og nafni, Erlendur Þorleifsson, bjó ásamt eiginkonu sinni Margréti Magnúsdóttir á Ketilvöllum 1888-1909.

VM - Félag vélstjóra og málmtæknimanna, brást af einstakri rausn við beiðni Dalbúa um aðstoð við að gera klúbbnum mögulegt að nýta þetta einstæða tækifæri, og hefur ákveðið að gefa golfklúbbnum þessar þrjú hundruð trjáplöntur fyrir völlinn í Miðdal.

Í tilefni þessa þarf á næstunni að sækja trén í núverandi gróðurreit, og koma þeim fyrir á svæði Dalbúa þar til ákveðið hefur verið hvar þær skuli endanlega staðsettar á vellinum. Plönturnar eru að meðaltali 1 – 2 metra háar, og allar í pottum og því tilbúnar til gróðursetningar. Það verður sameiginlegt verkefni félagsins á næstunni að huga að mögulegum staðsetningum fyrir trén, þannig að þau megi sem best þjóna þeim tilgangi að gera völlinn enn skemmtilegri fyrir félagsmanna og aðra kylfinga í framtíðinni.

Stjórn golfklúbbsins Dalbúa vill koma á framfæri innilegu þakklæti sínu til Dr. Erlends Haraldssonar og VM - Félags vélstjórna og málmtæknimanna, fyrir þessa höfðinglegu gjöf. Það er ekki á hverjum degi sem golfklúbbi er færður heill skógur að gjöf, og verður spennandi að sjá með hvaða hætti þessi veglega gjöf á eftir að efla völlinn í Miðdal á komandi árum.

Stjórn GD.

Hér má sjá myndir frá afhendingunni.