Breytingar á golfreglum

Viðamiklar breytingar á golfreglunum taka gildi frá og með áramótum 2019.  
20 mikilvægustu breytingarnar á golfreglunum eru eftirfarandi:

1.   Leitartími – Styttur úr 5 mínútum í 3 mínútur.

2. Bolti hreyfist við leit – Lagður aftur á fyrri stað (vítalaust).

3. Sokkinn bolti – Vítalaus lausn utan brauta.

4. Mæling þegar bolti er látinn falla – Lengsta kylfan (önnur en pútter) notuð. 

5. Bolti látinn falla – Úr hnéhæð, í stað axlarhæðar.

6. Ekki leyfilegt að taka sér stöðu á rangri flöt– Vítalaus lausn.

7. Leikmaður slær bolta í sjálfan sig eða útbúnað sinn – Vítalaust.

8. Bolti tvísleginn – Talið sem eitt högg (vítalaust).

9. Tilfallandi snerting á sandi í glompu leyfð.

10. Fjarlægja má lausung hvar sem er.

11. Taka má lausn úr glompu gegn tveimur vítahöggum.

12. Vatnstorfærur kallast vítasvæði.

13. Leyfilegt að snerta vatn eða jörð innan vítasvæðis.

14. Bolti hreyfist á flöt eftir að hafa verið merktur, lyft og lagður niður aftur

       – Lagður aftur á fyrri stað, vítalaust.

15. Bolti hreyfður fyrir slysni á flötinni – Lagður aftur á fyrri stað, vítalaust.

16.  Lagfæra má svo til allar skemmdir á flötum.

17. Ekki má leggja kylfu niður til að aðstoða við miðun.

18. Kylfuberi má ekki aðstoða við miðun.

19. Leyfilegt að hafa flaggstöngina í holunni þegar púttað er.

20. Bolti sem er skorðaður við flaggstöng telst í holu.

Aðalfundur Golfkúbbs Dalbúa 29. nóvember 2018

FUNDARBOÐ:

AÐALFUNDUR GOLFKLÚBBS DALBÚA

Íþróttamiðstöðinni Laugardal (í Reykjavík) A-salur
fimmtudaginn 29. nóvember 2018 kl. 19:30

Dagskrá:
Samkvæmt 16. gr. laga félagsins:

Aðalfundur kýs fundarstjóra og ritara eftir tillögu stjórnar.

  1. Skýrsla stjórnar um störf og framkvæmdir á liðnu starfsári.
  2. Kynning á endurskoðuðum ársreikningi félagsins.
  3. Umræður um skýrslu stjórnar og ársreikning og hann borinn upp til samþykktar.
  4. Afgreiðsla tillagna til lagabreytinga.
  5. Tillögur sem borist hafa teknar til umræður og afgreiðslu.
  6. Ákveðið árgjald og önnur gjöld fyrir næsta starfsár.
  7. Kosning stjórnar og varamanna í stjórn, sbr. 10. gr.
  8. Kosning tveggja skoðunarmanna reikninga og eins til vara.
  9. Lögð fram fjárhagsáætlun næsta starfsárs.
  10. Önnur mál.

Tillögur til lagabreytinga þurfa að berast stjórn félagsins. Komi fram tillögur að lagabreytingum verða þær kynntar á heimasíðu félagsins – www.dalbui.is

Breytingar verða á stjórn eins og gerist í öllum félögum.  Formaður hefur ákveðið að gefa áfram kost á sér til formennsku. Eins og ávallt hvetur stjórn félagsins félagsmenn til að gefa kost á sér til stjórnar- og nefndarstarfa fyrir næsta starfsár.  Ef þið hafið áhuga eða vitið af áhuga á slíku vinsamlegast hafið samband við formann félagsins, Bryndísi Scheving, með tölvupósti (bryndisscheving@gmail.com) eða símleiðis (862 8995) sem allra fyrst.

Ný stjórn mun m.a. skipa í mótanefnd, vallarnefnd, aganefnd og forgjafanefnd að loknum aðalfundi. Mikið hefur mætt á stjórnarmönnum þar sem erfiðlega hefur gengið að manna ofangreindar nefndir, og væri skemmtilegt ef fleiri tækju þátt í því starfi sem nefndirnar vinna, einkum á því afmælisári sem er fram undan. Fyrir klúbb eins og Dalbúa er mikilvægt að sem flestir félagar taki þátt í starfinu og gefi kost á sér í stjórn eða nefndir.  Reynslan sýnir að því betur sem nefndir eru mannaðar því minni tíma tekur að sinna þeim verkefnum sem nauðsynlegt er að vinna.

Hér með er skorað á félagsmenn að mæta á aðalfund félagsins, fylgjast með hvernig hefur gengið og taka þátt í frekari uppbyggingu golfklúbbsins, m.a. með því að gefa kost á sér í nefndar- eða stjórnarstörf, því margar hendur vinna létt verk. Eins og fyrr segir verður ekki skipað í nefndir á aðalfundi – það er verkefni stjórnar eftir fundinn – en þar gefst gott tækifæri til að ræða málin og efla félagsandann.

Að lokum vil ég sem fráfarandi formaður þakka ykkur öllum fyrir frábært samstarf á liðnum árum og ítreka að í sameiningu munum við halda áfram að gera góðan klúbb enn betri í framtíðinni.

f.h. stjórnar Golfklúbbs Dalbúa
Bryndís Scheving
formaður.

Vinnudagur 6. október 2018

Ágætu Dalbúar,
Síðasti vinnudagur ársins verður á morgun 6. október kl. 11.
Léttar veitingar verða í boði fyrir vinnufólk.

Nú er framundan að búa völlinn undir veturinn, t.d. með því að loka flötum og teigum, gata allar flatir og teiga, taka saman lausamuni o.s.frv. Völlurinn verður í vetur lokaður fyrir almenna umferð, en félagsmenn geta leikið hann í samræmi við reglur um vetrargolf þegar færi gefst, og til að gera það mögulegt verða búnar til einfaldar vetrarflatir.

Félagsmenn eru hvattir til að fjölmenna í Miðdal og taka þátt í léttum verkum, auk þess að einfaldlega að hittast og fá sér síðast kaffisopa sumarsins í skálanum áður en honum verður lokað.

Stjórnin

Lok golfvertíðar í Miðdal

Ágætu félagar í Dalbúa,

Nú er komið að lokum golfvertíðarinnar á vellinum í Miðdal sumarið 2018.

Eftir harðan vetur og síðan kalt og blautt vor var völlurinn í viðkvæmu ástandi í upphafi sumars, en fór sífellt batnandi eftir því sem á leið. Fyrir tilstilli mikillar vinnu umsjónaraðila var völlurinn með besta móti þegar leið á sumarið, og sláttur hefur sjaldan verið meiri eða betri, bæði á brautum og karga, enda höfðu margir félagsmenn og gestir orð á að það hefði aldrei gengið betur að finna boltana sína til að halda áfram skemmtilegum leik.

Meðal haustverka á vellinum er að allur hár kargi milli brauta (t.d. milli 5. og 6. brautar-, 6. og 7. brauta o.s.frv.) hefur nú verið sleginn niður og fjarlægður, og stefnt er að því að þessi svæði verði slegin sem venjulegur kargi næsta sumar. Það segir sitt um hversu erfið þessi svæði hafa verið kylfingum síðustu ár að við þennan slátt komu í leitirnar hátt á þriðja hundrað golfboltar, sem verða boðnir kylfingum til endurkaups næsta sumar – að sjálfsögðu undir heitinu „boltar með reynslu“!

Nú er framundan að búa völlinn undir veturinn, t.d. með því að loka flötum og teigum, gata allar flatir og teiga, taka saman lausamuni o.s.frv. Völlurinn verður í vetur lokaður fyrir almenna umferð, en félagsmenn geta leikið hann í samræmi við reglur um vetrargolf þegar færi gefst, og til að gera það mögulegt verða búnar til einfaldar vetrarflatir.

Stefnt er að vinnudegi á vellinum helgina 6.-7. október. Ákvörðun um vinnudaginn verður tekin eftir því sem veðurspá segir til um til að velja betri daginn, og verður tilkynning um vinnudag og tíma birt á vefsíðu klúbbsins (www.dalbui.is) á fimmtudag.

Félagsmenn eru hvattir til að fjölmenna í Miðdal og taka þátt í þessum léttu verkum, auk þess að einfaldlega að hittast og fá sér síðast kaffisopa sumarsins í skálanum áður en honum verður lokað.

Aðalfundur Dalbúa verður síðan haldinn síðari hluta nóvember, og í kjölfarið hefst undirbúningur starfsins á næsta ári, en sumarið 2019 verða 30 liðinn frá því að golfklúbburinn Dalbúi var stofnaður, sem gefur tilefni til veglegrar dagskrár yfir sumarið.

Stjórnin.

Lokamót Dalbúa laugardaginn 15. sept. 2018

Kæru félagsmenn!

Þar sem sumri er farið að halla og stutt eftir af golftímabilinu langar okkur í stjórninni að hafa mót fyrir félagsmenn laugardaginn 15. september. Það væri gaman að hittast, spila léttan og líflegan golfhring og enda daginn á grillveislu í skálanum okkar þar sem tækifæri gefst til þess að spjalla og skemmta sér saman.

Að þessu sinni verður golfmótið 9 holu punktamót og eiga því allir félagsmenn góða möguleika á verðlaunasætum!

Við endum daginn á grillveislu í skálanum okkar þar sem tækifæri gefst til þess að spjalla og skemmta sér saman.

Vegleg verðlaun eru fyrir 1. 2. og 3. sæti. Einnig verða veitt verðlaun fyrir lengsta teighögg á 3. braut og nándarverðlaun á 5. og 8. braut.

Verð: 5.500 (golf + grill)

Félagsmenn eru hvattir til að fjölmenna á þetta síðasta mót sumarsins og gera sér glaðan dag saman!

Allar nánari upplýsingar eru á golf.is

Hlökkum til að sjá ykkur sem flest!

Kveðja,
stjórnin

GD / Síminn golfmot – úrslit

Síminn / GD golfmótið fór fram um helgina – 25. ágúst.
Úrslit voru eftirfarandi:

1. sæti – DJ Villz – Vilmundur Þór Jónasson / Viktor Jóhannesson 63 högg nettó
2. sæti – Mulligan á fyrstu – Bragi Dór Hafþórsson / Sigurður Orri Hafþórsson 65 högg nettó
3. sæti – Góður & Betri – Pétur Már Sigurðsson / Örn Ólafsson 67 högg nettó

Lengsta teighögg karla – Sigurður Hafsteinsson
Lengsta teighögg kvenna – Helena S. Kristinsdóttir

Næstur holu 5 – Sigurður Hafsteinsson
Næstur holu 8 – Guðmundur Gunnarsson

Þökkum Símanum fyrir góðan stuðning og einnig frábærum þátttakendum sem voru í góðum gír í frábæru veðri.

Styrktarmót Dalbúa og Símans 25.08.2018

Stórskemmtilegt mót með glæsilegum verðlaunum í boði Símans.

Leikformið er Texas Scramble deilt með 3, þar sem hámarksforgjöf karla er 28 og hámarksforgjöf kvenna er 34; vallarforgjöf beggja keppenda er lögð saman og deilt í með þremur; keppnisforgjöf liðs getur þó ekki orðið hærri fyrir viðkomandi lið en þess keppanda sem er með lægri vallarforgjöfina

(Athugið: Ekki taka mark á forgjöfinni sem birtist við skráningu á golf.is, þar sem hún er ekki í takt við ofangreinda reikniformúlu).

Athugið: Ekki er hægt að vinna til verðlauna nema hafa löglega forgjöf.

Ræst verður út á öllum teigum kl. 10:00 og eru keppendur beðnir að skrá liðið saman á rástíma (skráning rástíma er þó að eins til skráningar, þar sem allir verða ræstir út á sama tíma).

Allir keppendur fá teiggjafir ásamt hamborgara að hætti hússins að móti loknu í boði Símans.

Verðlaun:

Vegleg verðlaun í boði Símans, en auk þess verða veitt verðlaun fyrir lengsta teighögg karla og kvenna á valinni braut og fyrir upphafshögg næst holu á par 3. brautum vallarins. – Loks verður veglegur vinningur dreginn úr skorkortum keppenda (aðeins þeirra sem ekki hafa þegar unnið til verðlauna)

Mótsgjald er 4.000 kr. á hvern þátttakanda, en þar sem um styrktarmót Dalbúa er að ræða þá er keppendum frjálst að greiða meira en mótsgjaldið. Þá býðst fyrirtækjum að styrkja klúbbinn og greiða 10.000 kr. fyrir keppnislið í sínu nafni.

Allur ágóði af mótinu rennur til uppbyggingar á vellinum Í Miðdal og til að styrkja starfsemi klúbbsins.

 

  1. Sæti: Fitbit Alta heilsuúr https://vefverslun.siminn.is/vorur/aukahlutir_new/lifstill/listill_gadget/fitbit_alta_hr_black_large/#pv_14443
  2. Sæti: Titleist derhúfa, FootJoy skópoki og Zipp þráðlaus hátalarihttps://vefverslun.siminn.is/vorur/aukahlutir_new/hatalarar/bluetooth_hatalarar/libratone_zipp_mini/#pv_14353
  3. Sæti: Titleist derhúfa, FootJoy skópoki og Orkukubburhttps://vefverslun.siminn.is/vorur/aukahlutir_new/lifstill/listill_gadget/fitbit_alta_hr_black_large/#pv_14443

Nándarverðlaun: Titleist derhúfa, FootJoy skópoki og PopSocket https://vefverslun.siminn.is//vorur/aukahlutir_new/hitt_thetta/popsocket/#pv_14059

Dregið úr skorkortum (muna að taka út þá sem lentu í verðlaunasætum
Video Dyrabjalla

https://vefverslun.siminn.is//vorur/aukahlutir_new/lifstill/listill_gadget/video_dyrabjalla_svort/

Orkukubbur
https://vefverslun.siminn.is/vorur/sumar_2018/xqisit_10400/#pv_13161

Meater þráðlaus grillhitamælir
https://vefverslun.siminn.is/vorur/sumar_2018/meater_maelir/#pv_14510

Úrslit í kvennamóti Dalbúa 2018

Lavera kvennamótið var haldið í dag í blíðskaparveðri. Sólin lét sjá sig konum til mikillar gleði og var hitinn um og yfir 18 ° gráður.

15 konur mættu til leiks og höfðu gaman að. Þær fóru allar sáttar heim með flottar snyrtivörur og sól í hjarta.

Úrslitin voru:

1. sæti Þórunn Jóna Hauksdóttir
2. sæti Rannveig Hjaltadóttir
3.sæti Bjarndís Lárusdóttir

Lengsta teighögg á 3.braut:
Berglind Ósk Geirsdóttir

Næst holu á 5.braut:
Sigurlaug J. Friðriksdóttir

Næst holu á 8.braut:
Kristín Mogensen

Kvennamót Dalbúa 2018

Kvennamót Dalbúa verður laugardaginn 11. ágúst klukkan 10.

Konur fjölmennum og skemmtum okkur saman í þessu flotta móti.
Spilaðar verða 9 holur (1 hringur). Allar konur fá flottar teiggjafir frá Lavera og vinningarnir eru mjög glæsilegir en þeir eru allir frá Lavera.

Lavera eru þýskar náttúrulegar og vottaðar lífrænar húðvörur sem notið hafa mikilla vinsælda í 30 ár!

Súpa og léttar veigar verða að leik loknum á sanngjörnu verði.
Skráning og nánari upplýsingar eru á golf.is